झलारी : शुक्लाफाँटा नगरपालिकामा परीक्षा केन्द्र निर्धारण गरी नगर स्तरीय कक्षा ८ को परीक्षा सञ्चालन गरिएको छ ।
आधारभूत तह कक्षा ८ को परीक्षा सञ्चालन तथा प्रमाणिकरण सम्बन्धी मापदण्ड २०७६ परीक्षाको स्तरीयता, विश्वसनियता, प्रमाणिकरण र समकक्षतामा एकरुपता कायम गर्नका लागि छ वटा परिक्षा केन्द्र निर्धारण गरिएका हुन । पहिले सम्बन्धीत विद्यालयमै विद्यार्थीले परीक्षा दिने व्यवस्था गरिदै आएको थियो । चालु शैक्षिक सत्रमा परीक्षा केन्द्र निर्धारण गरी परीक्षा लिने कार्य भैरहेको छ ।

नगरपालिकाका शिक्षा शाखाका प्रमुख टिकेन्द्रराज भट्टका अनुसार राष्ट्रिय माध्यमिक विद्यालय पिपलाडी, सिद्धबैजनाथ माध्यमिक विद्यालय वन्साहा, कालिका माध्यमिक विद्यालय असैना, कृष्ण माध्यमिक विद्यालय झलारी, सरस्वती माध्यमिक विद्यालय अमरपुर र धर्मजनता माध्यमिक विद्यालय स्टेशनपुरमा परीक्षा केन्द्र राखिएका छन । शिक्षकले पढाउनु पर्छ, विद्यार्थीले पढनु पर्छ अभिभावकले विद्यालय गएका बालबालिका पढि राखेका छन वा छैनन भनेर जानकारी राख्नु पर्छ भन्ने भावना जागृत हुनु पर्छ भन्ने उद्देश्य राखेर विद्यार्थीको ‘इन्टरचेन्ज’ गरी परीक्षा सञ्चालन गरिएको नगरपालिकाको शिक्षा शाखाका प्रमुख टिकेन्द्रराज भट्टले बताउनु भयो ।

परीक्षालाई मर्यादित बनाउनका लागि एक बेन्चमा दुई जना विद्यार्थीलाई राखेर परीक्षा लिने कार्य भैरहेको उहाँले बताउनु भयो । “विद्यार्थीलाई नक्कल गर्नबाट रोक्नका लागि परीक्षा कोठामै निरीक्षकले निगरानी राख्ने कार्य गर्छन” उहाँले भन्नु भयो, “परीक्षा केन्द्रमा छिर्नु अघि गेटमै विद्यार्थीलाई चेकजाँच गरेर परीक्षा कक्षमा प्रवेश गराउने व्यवस्था गरिएको छ ।” परीक्षालाई मर्यादित र विश्वसनिय बनाउनका लागि स्थानिय तहले तोके बमोजिम प्रशासकिय अधिकृत वा शिक्षा हेर्ने प्रमुखको संयोजकत्वमा परीक्षा समिति रहने व्यवस्था रहेको छ । सोही समितिले परीक्षा सञ्चालन गरि रहेको छ । परीक्षामा नगरपालिकाका सामुदायिक विद्यालयका एक हजार एक सय ६५ बढी विद्यार्थी सम्मीलित भएका छन । परीक्षा चैत २ गते देखि सञ्चालनभै १० गते सम्पन्न हुने छ ।