कैलाली : सुदूरपश्चिम कैलालीको गेटास्थित सहिद दशरथ चन्द स्वास्थ्य विज्ञान विश्वविद्यालयअन्तर्गत ६ सय शैयाको अस्पताल सञ्चालन गरेर चिकित्सा शिक्षाको पठनपाठन सुरु गर्न स्थानीयले माग गरेका छन्। सहिद दशरथ चन्द स्वास्थ्य विज्ञान विश्वविद्यालय सरोकार समितिले काठमाडौंमा शिक्षा, विज्ञान तथा प्रविधि मन्त्री महावीर पुनलाई बिहीबार ज्ञापनपत्र बुझाउँदै अस्पताल सञ्चालन र चिकित्सा शिक्षाको पठनपाठन यसै वर्ष सुरु गर्न माग गरेको हो।
विश्वविद्यालय ऐनअन्तर्गत बाँकी रहेका विश्वविद्यालय सभा सदस्य नियुक्त गरी सभालाई पूर्णता दिन पनि समितिले माग गरेको छ। समितिका संयोजक लोकराज पाण्डेयका अनुसार ज्ञापनपत्र बुझ्दै मन्त्री पुनले यसै वर्ष पूर्ण क्षमताको अस्पताल सञ्चालनसहित चिकित्सा शिक्षाको पठनपाठन सुरु गर्ने बताए।शिक्षा मन्त्री यो विश्वविद्यालयको सहकुलपति रहने व्यवस्था छ। मन्त्री पुनको अध्यक्षतामा हालै बसेको विश्वविद्यालय सभाले सहिद दशरथ चन्द स्वास्थ्य विज्ञान विश्वविद्यालयको उपकुलपति नियुक्तिका लागि सिफारिस समिति गठन गरेको थियो। समितिले दुवै पदमा आवेदन खुला गरिसकेको छ।
संयोजक पाण्डेयले विश्वविद्यालयका पदाधिकारी नियुक्तिको प्रकृया सुरु भइसकेकाले अब अस्पताल र शैक्षिक कार्यक्रम अगाडि बढाउन मन्त्रालयमै पुगेर मन्त्रीको ध्यानाकर्षण गराइएको बताए। सरकारले गेटामा मेडिकल कलेजका नाममा करिब पौने सात अर्ब लागतका भौतिक संरचना निर्माण गरेको छ। ती संरचनाहरु पाँच वर्षदेखि प्रयोगविहीन छन्। मेडिकल कलेजका नाममा पूर्वाधार निर्माण गरिए पनि सरकारले पछि गेटामा स्वास्थ्य विज्ञान विश्वविद्यालय सञ्चालन गर्ने निर्णय गरेको थियो। तर सञ्चालनमा ढिलाइ हुँदा लामो समयदेखि प्रयोगविहीन संरचनाहरु जीर्ण बन्न थालेका छन् । गेटालाई स्वास्थ्य विज्ञान विश्वविद्यालय बनाएपनि समस्या उस्तैछ ।
