कञ्चनपुर : मेचीदेखि महाकालीसम्मको मैत्री, स्वास्थ्य र वातावरणीय सन्देशसहित सुरु गरिएको टुर डि मेची–महाकाली साइक्ल यात्रा २०८२ अन्तर्गत यात्रा टोली कञ्चनपुर आइपुगेपछि निङ्गलाशैनी बहुउद्देश्यीय सहकारी संस्थाले स्वागत–अभिनन्दन तथा सम्मान कार्यक्रम आयोजना गरेको छ। भद्रपुर नगरपालिकाका पूर्व नगरप्रमुख जिवनकुमार श्रेष्ठको नेतृत्वमा रहेको ५ सदस्यीय साइक्ल टोली कञ्चनपुर आइपुगेपछि सहकारी संस्थाले औपचारिक रूपमा स्वागत गरेको हो।
नेता श्रेष्ठले स्वास्थ्ययुक्त जीवनशैली, वातावरण संरक्षण तथा प्रदूषण न्यूनीकरणका लागि साइक्लिङलाई प्रभावकारी माध्यमका रूपमा अघि सार्दै युवालाई खेलतर्फ आकर्षित गराउने उद्देश्यले यात्रा आयोजना गरिएको जानकारी दिए।
उनका अनुसार टोलीले कार्तिक २३ गते मेचीबाट यात्रा सुरू गरी कार्तिक १ गते महाकाली पुगेको तथा कार्तिक ३ गतेदेखि पुनः साइक्लमार्ग हुँदै मेची फर्कने योजना रहेको बताए।
यात्रा टोलीमा भद्रपुर साइक्लिङ क्लबका पदाधिकारी मनोज सिंह, देविबहादुर श्रेष्ठ, समिर पोखरेल, विश्वचन्द्र महतो लगायतको सहभागिता रहेको थियो। स्वागत तथा सम्मान कार्यक्रममा निङ्गलाशैनी बहुउद्देश्यीय सहकारी संस्थाका संस्थापक सचिव बिष्णु नाथ, प्रमुख कार्यकारी अधिकृत प्रेम सिंह भाट, प्रबन्धक बविता चन्द लगायतको उपस्थिति रहेको थियो।
