कञ्चनपुर: आज नेकपा माओवादी केन्द्र, नेकपा एकीकृत समाजवादी सहितका राजनीतिक दलको एकता हुँदैछ । १९कार्तिक(बुधबार)का दिन काठमाण्डौँमा नेकपा एकीकृत समाजवादी सहितका नौँ राजनीतिक दलको एकता हुन लागेको हो । टुटफुटमा रहेका कम्युनिष्ट दलहरु जेनजी आन्दोलनपछि धुव्रीकृत हुन लागेका छन । जसले ‘नेपाली कम्युनिस्ट पार्टी’ नाम राख्ने प्रस्ताव पारित गरेको हो ।
माओवादी नेता रामप्रसाद सापकोटा दिपशिखाका अनुसार एकीकृत पार्टीको नाम ‘नेपाली कम्युनिस्ट पार्टी’ र चुनाव चिन्ह तारा राखिने भएको छ । नेताहरूका अनुसार माओवादी केन्द्रबाट पारित भएको यो नामबारे अन्य एकतामा रहेका पार्टीहरूसँग समेत छलफल भएर अगाडि बढ्नेछ । एकतामा प्रचण्ड नेतृत्वको माओवादी, माधव नेपाल नेतृत्वको एकीकृत समाजवादी, महिन्द्र राय यादव नेतृत्वको नेपाल समाजवादी पार्टी (नेसपा), एमालेबाट अलग भएका प्रेमबहादुर सिंह र राजु कार्की नेतृत्वको नेकपा समाजवादी, सुवास काफ्ले नेतृत्वको जनसमाजवादी, गोपाल किराँती नेतृत्वको माओवादी कम्युनिस्ट पार्टी नेपाल र नेकपा विप्लवबाट अलग भएका चिरण सी सहितका दल सहभागी हुनेछन् ।
एकीकृत पार्टीको विधान, राजनीतिक दस्ताबेज र घोषणापत्र तयार गर्ने जिम्मा माओवादीबाट देव गुरुङ, वर्षमान पुन र रेखा शर्मा तथा एकीकृत समाजवादीबाट डा. बेदुराम भुसाल, प्रमेश हमाल र प्रकाश ज्वालालाई दिइएको छ । ज्वालाका अनुसार एकता प्रक्रियाका सबै काम अन्तिम चरणमा पुगेका छन् र घोषणा सभापछि पार्टी दर्ता गरी २१ फागुनको निर्वाचनका लागि तयारी सुरु गरिनेछ ।
नयाँ पार्टीको नाम नेकपा समाजवादी र चुनाव चिह्न तारा हुनेछ ।पार्टीको मार्गदर्शक सिद्धान्त माक्र्सवाद–लेनिनवाद, क्रान्तिको कार्यक्रम नेपाली विशेषताको समाजवाद, दीर्घकालीन लक्ष्य वैज्ञानिक समाजवाद, संगठनात्मक सिद्धान्त जनवादी केन्द्रीयता रहनेछ । तर, बहुपद भने नरहने नेताहरूले बताएका छन् । नेपाली समाजको चरित्र पुँजीवादी, नेपाली समाजको मुख्य समस्या दलाल नोकरसाही पुँजीवाद रहेकाले समाजवादका लागि शान्तिपूर्ण क्रान्ति गर्ने निष्कर्ष छ ।
