हेमा भट्ट / कञ्चनपुर : महाकाली प्रादेशिक अस्पतालले कुकुर, बिरालो, बाँदरलगायतका जनावरले टोकेपछि लगाइने एआरभी खोप पुनः निःशुल्क उपलब्ध गराउन थालेको छ। नेपाल सरकारबाट आवश्यक खोप उपलब्ध हुन नसक्दा गत जेठ २ गतेदेखि रोकिएको निःशुल्क सेवा आजदेखि पुनः सञ्चालनमा आएको अस्पतालले जनाएको छ। अस्पताल व्यवस्थापन समितिका अध्यक्ष महेशप्रसाद पन्तका अनुसार सुदूरपश्चिम प्रदेश आपूर्ति केन्द्र, धनगढीबाट साउन २६ गते एआरभी खोप प्राप्त भएपछि अस्पतालबाटै सेवाग्राहीलाई निःशुल्क खोप उपलब्ध गराउन थालिएको हो। लामो समयसम्म खोपको अभाव हुँदा जनावरको टोकाइबाट प्रभावित सेवाग्राहीलाई उपचारका लागि अन्यत्र जानुपर्ने अवस्था सिर्जना भएको थियो।
विशेषगरी कुकुर तथा अन्य जनावरको टोकाइपछि समयमै खोप लगाउनुपर्ने भएकाले अस्पतालमा एआरभी उपलब्ध नहुँदा सेवाग्राहीलाई थप समस्या परेको थियो। अस्पतालले खोप अभावका कारण सेवाग्राहीमा पर्न गएको असुविधाप्रति क्षमायाचना गरेको छ। अस्पताल व्यवस्थापन समितिका अध्यक्ष पन्तले अस्पतालको सेवा निरन्तर र प्रभावकारी बनाउने उद्देश्यअनुसार आवश्यक औषधि तथा खोपको उपलब्धताका लागि सम्बन्धित निकायसँग समन्वय भइरहेको बताए। जनावरको टोकाइबाट हुने रेबिज घातक रोग भएकाले समयमै उपचार तथा खोप लगाउनु अत्यन्त आवश्यक मानिन्छ। विशेषगरी सडक तथा समुदायमा छाडा कुकुरको संख्या बढिरहेको अवस्थामा कुकुरले टोकेका बिरामीको संख्या पनि बढ्ने गरेको स्वास्थ्यकर्मीहरू बताउँछन्।
अस्पतालमा एआरभी खोप निःशुल्क उपलब्ध हुन थालेपछि जनावरको टोकाइबाट प्रभावित सेवाग्राहीलाई राहत पुगेको छ। आर्थिक अवस्था कमजोर भएका नागरिकका लागि सरकारी अस्पतालबाट निःशुल्क रूपमा खोप उपलब्ध हुनु अझ महत्वपूर्ण मानिएको छ। महाकाली प्रादेशिक अस्पताल व्यवस्थापन समितिले खोप सेवा पुनः सञ्चालनमा आएकाले जनावरले टोकेका सेवाग्राहीलाई समयमै अस्पतालमा सम्पर्क गरी आवश्यक स्वास्थ्य सेवा लिन आग्रह गरेको छ। अस्पतालले आगामी दिनमा पनि अत्यावश्यक औषधि तथा खोपको नियमित आपूर्तिका लागि सम्बन्धित निकायसँग आवश्यक समन्वय र पहल जारी राख्ने जनाएको छ। महाकाली प्रादेशिक अस्पताल व्यवस्थापन समिति तथा अस्पताल परिवारले एआरभी खोपको अभावका कारण सेवाग्राहीमा पर्न गएको समस्याप्रति क्षमा माग्दै साउन २६ गतेदेखि पुनः निःशुल्क सेवा उपलब्ध भएको जानकारी गराएको हो।
