कैलाली: १०औँ राष्ट्रिय खेलकुद प्रतियोगिता–२०८३ अन्तर्गत सुदूरपश्चिम प्रदेशस्तरीय महिला फुटबल छनोट प्रतियोगिताको फाइनलमा कैलाली र कञ्चनपुरबीच प्रतिस्पर्धा हुने भएको छ।
निर्धारित कार्यक्रमअनुसार कार्तिक ३० गते हुने फाइनल खेल कैलालीको जुगेडा–१२ स्थित मनकामना युवा क्लबको खेलमैदानमा बिहान ठीक ९ बजे सञ्चालन हुने प्रतियोगिता संयोजक काशीराम बोहराले जानकारी दिएका छन्।
विशेष कारणवश यसअघि दिउँसो ३:४५ बजेका लागि निर्धारित खेलको समय परिवर्तन गरी बिहान ९ बजे कायम गरिएको आयोजकले जनाएको छ।
फाइनल खेलमा कैलाली र कञ्चनपुरबीच उपाधिका लागि प्रतिस्पर्धा हुने भएकाले खेललाई चासोका साथ हेरिएको छ। आयोजकले सम्पूर्ण खेलप्रेमी, दर्शक तथा शुभेच्छुकहरूलाई खेलमैदानमा उपस्थित भई खेलाडीको हौसला बढाउन अनुरोध गरेको छ।
