कञ्चनपुर । दोधारा चाँदनी झोलुङ्गे पुल भत्किएर आवामन रोकिएपछि पुल वारिपारि तर्फका होटल व्यवसाय धरासायी बनेका छन् । गत असोज दोस्रो साता महाकाली नदीमा आएको बाढीले दोधारा चाँदनी र भीमदत्त नगरपालिका जोड्ने उक्त पुल धरासायी भएपछि सो क्षेत्रमा आन्तरिक तथा बाह्य पर्यटक अवलोकनका लागि आउने क्रम घट्दै गएको छ् । “पुलको एउटा पिल्लर भत्किएपछि हाम्रो त मुखमै ताला लगाए जस्तो भयो ।” होटल व्यवसायी मोहन बहादुर सिंहले भने, “स्थानीय प्रशासनले पुलको दुवै तर्फ ताला लगाएको छ् । हिडडुल पूर्ण रुपमा बन्द हुदा व्यापार व्यवसाय धरायासी बन्यो ।” पुल भत्किएपछि आएको प्राविधिक टोलीले पुल निर्माणमा रु. २० करोड लागत लाग्नुका साथै पुल निर्माण सक्न एक वर्ष लाग्ने अनुमान सहितको प्रतिवेदन पेस गरेको छ् । “दशै तिहारका बेला यहाँ पर्यटकको आवागमन धेरै हुदा हाम्रो पनि वर्ष भरिको कमाइ बेला हुन्थ्यो”, सिंहले भने, “अझै पनि चार लेनको पुल हुदै झोलुङ्गे पुल हेर्न आउछन् तर हेर्ने वातावरण तयार भएको छैन ।” उहाँले दूरीका हिसाबले छोटो पर्ने भएकाले दुई पाङ्ग्रे सवारी साधन र दोधारा चाँदनीका स्थानीय पैदल यात्रा झोलुङ्गे पुलबाट गर्ने गरेका थिए ।
“महाकाली नदीमा पानी घटिसक्यो । अब त सरकारले पुल बनाउन थालनी गरिदिए हुन्थ्यो”, सिंहले भने, “पुल नबन्दा सम्म वारिपारिका व्यवसायी निरास छन् । दैनिक रु. आठ/दश हजार कमाइ हुन्थ्यो । अहिले त ठप्प भयो ।” त्यसैगरी यहाँको भीमदत्त नगरपालिका–१३ का वडाध्यक्ष रामचन्द्र बोहराले चाडपर्वका बेला भरिभराउ हुने झोलुङ्गे पुल यो पटक भने सुनसान रहेको बताए । उनले भने, “दशै तिहारका बेला दैनिक दुइर् देखि तीन हजार पर्यटक यहाँ अवलोकनका लागि आउथे।” वडाध्यक्ष बोहराले भने, “हिउदका बेला शैक्षिक भ्रमणले यो क्षेत्रको व्यापार व्यवसाय राम्रै हुन्थ्यो ।” पुल बन्द अवस्थामा रहदा यसको प्रभाव धेरै तिर परेको छ ।” उनले पुल पुनर्निर्माणका लागि तत्काल पहल हुनुपर्नेमा जोड दिए । “पुल भत्किएका बेला अवस्था बुझ्न जनप्रतिनिधि देखि राजनीतिज्ञ सम्म आए।” बोहराले भने, “तर स्थलगत रुपमा पुल पुनर्निर्माणको कुनै सुरसार देखिएको छैन ।
” पुल पुनर्निर्माणका लागि सुदूरपश्चिम प्रदेश सरकारले एक करोड विनियोजन गरेको छ । यता कञ्चनपुर उद्योग वाणिज्य सङ्घका अध्यक्ष दिनेश मल्लले पुल पुनर्निर्माण तत्काल अघि बढाउनुपर्ने बताउन्छन् । उनले दोधारा चाँदनी पुल आवागमन सहजताका लागि मात्रै नभएर कञ्चनपुरको पर्यटकीय स्थलका रुपमा परिचित रहेको बताए ।
“पुल समयमा नबने यहाँ पर्यटक आवागमन समेत घट्ने अवस्था छ”, अध्यक्ष मल्लले भने, “पर्यटन प्रवद्र्धनका लागि पनि पुल पुनर्निर्माण छिटो हुनु आवश्यक छ् ।”
