पप्पु गुरुङ्ग, दोधारा । दोधारा चाँदनी नगरपालिका– ३ बडुवाल टोलका बसोबास गर्दै आएका बादी समुदायले आफूहरुको बेवास्ता भएको गुनासो गरेका छन । वर्षौ देखि पछौटपन र गरिबीमा बाँच्न बाध्य भएको उनीहरुको दुखेसो छ् । विगतका दिनहरुमा जसोतसो गुजारा चलाउदै आएका उनीहरु विगत केही महिना खाना र बस्नको समस्या बडेर गएको छ् । नाच्ने, गाउने र मादल बनाउने वर्षौ देखिको पुख्यौली पेशाबाट अब बाँच्न सक्ने अवस्था नरहेको उनीहरुको भनाई छ् । पहिले पहिले बाउ बाजेले मादल बेचेर गित गाउदै अरुलाई मनोरञ्जन दिएर जीवन चलाए पनि अचेल आधुनिक बाजाको विकास संगै अब बादी समुदाय पुख्र्यौली पेशाले धान्नै नसक्ने स्थितिमा पुगेको छ् ।
पछिल्लो समय बादी समुदायका युवाहरु रोजगारीका लागि भारतका विभिन्न शहरमा जाने गरेका छन् । भारतमा काम नपाए पछि गाँउमै फर्किए पछि बिहान र साँझको छाक टार्नै धौधौ परिरहेको बादी समुदायको अगुवा बिरभाने बादीले बताएका छन् । गाँउघरमा पनि काम नपाइने र जगबुडा नदीमा माछा मारेर खान सक्ने अवस्था छैन् । माछा पनि पाईदैन् । गाँउमा कतै काम पनि पाईदैन् । केहि गर्ने वातावरण पनि छैन् । बिरभाने बादीले गुनासो गर्दै भने– ‘अर्को तिर हामीहरु संग पैसा पनि छैन् । त्यसैले सदियौ देखि पिछडिएका बादी समुदायको हितका लागि पनि सरकारले विशेष कार्यक्रम ल्याएर सहयोग गर्नु पर्यो ।’ दोधारा चाँदनी– ३ बडुवाल टोलमा ७ घरधुरी बादी परिवार बस्दै आएका छन् ।
लामो समय देखि आफूहरुले समस्या भोगिरहेको भए पनि कसैले पनि सुनुवाई नगरेको अर्का स्थानिय रेशम बादीले बताए । हामीले स्थानिय सरकारलाई बारम्बार आफूहरुका पिडा सुनाउदा समेत आश्वासन बाहेक अरु केहि पाउन सकेनौ । हाल देशमा तिन तहका सरकार भएर पनि राज्यको मूलधारबाट टाढा रहेका बडुवाल टोलका बादीहरुले पाउनुपर्ने सेवा, सुविधाबाट बन्चित गरिनु दुभाग्र्यपूर्ण भएको उनले उल्लेख गरे ।
रेशम बादीले आफूहरु संग गरी खाने जग्गा जमिन नहुदा समस्यामा परेको बताएका छन् । उनले सुरक्षित बासस्थान सहितको पुर्नस्थापना गरि दिनका लागि सरोकारवाला पक्षलाई आग्रह समेत गरे ।
