कञ्चनपुर : दुई दशकभन्दा लामो समय पत्रकारितामार्फत जनताको आवाज उठाउँदै आएका कञ्चनपुरका पत्रकार एवं समाजसेवी धनसिंह धामीले राजनीतिक यात्रा सुरु गरेका छन्। राष्ट्रिय प्रजातन्त्र पार्टी (राप्रपा) को सुदूरपश्चिम प्रदेश सदस्य बनेसँगै धामीले पत्रकारिता, समाजसेवा र वातावरण संरक्षणका क्षेत्रमा हासिल गरेको अनुभवलाई राजनीतिक जिम्मेवारीसँग जोडेर अघि बढ्ने बताएका छन्।
वि.सं. २०६० सालदेखि पत्रकारिता क्षेत्रमा सक्रिय धामीले भ्रष्टाचार, सुशासन, राज्यका नीति तथा नियमको कार्यान्वयन, नैतिक शिक्षाको अवस्था र लागुऔषध दुर्व्यसनजस्ता सामाजिक विषयलाई प्राथमिकताका साथ उठाउँदै आएका छन्। लामो समय समाचारका माध्यमबाट नागरिकका समस्या र जनसरोकारका मुद्दा सार्वजनिक बहसमा ल्याएका उनी अब राजनीतिक सहभागितामार्फत समाज परिवर्तनमा योगदान पुर्याउने उद्देश्यसहित अघि बढेका हुन्।
कम्प्युटर अपरेटरदेखि समाचार प्रमुखसम्म
धामीको पत्रकारिता यात्रा विकल्प दैनिकमा कम्प्युटर अपरेटरका रूपमा सुरु भएको थियो। कामप्रतिको लगनशीलता, निरन्तरको अभ्यास र अनुभवका आधारमा उनी कार्यकारी सम्पादकको जिम्मेवारीसम्म पुगे। त्यसपछि कञ्चनपुरबाट प्रकाशित हुने कञ्चनपुर पोस्ट दैनिकमा समाचार प्रमुखका रूपमा काम गरे भने दार्चुलाबाट सञ्चालित मालिकार्जुन खबर डटकममा प्रधान सम्पादकको जिम्मेवारीसमेत निर्वाह गरे।
पत्रकारिताको लामो यात्रामा उनले सत्यतथ्य समाचार सम्प्रेषण, जनसरोकारका विषयको उठान तथा आवाजविहीन नागरिकका समस्या सार्वजनिक गर्ने कामलाई प्राथमिकता दिँदै आएका छन्। पत्रकारितालाई सूचना प्रवाहको माध्यम मात्र नभई समाजका विकृति र विसङ्गतिविरुद्ध आवाज उठाउने जिम्मेवार क्षेत्रका रूपमा लिँदै आएका धामीको राजनीतिक प्रवेशलाई उनको सार्वजनिक जीवनको नयाँ अध्यायका रूपमा हेरिएको छ।
पत्रकारितासँगै हरियाली प्रवर्द्धनको अभियान
धामी पत्रकारितामा मात्र सीमित छैनन्। उनी कृषि, वातावरण संरक्षण र हरियाली प्रवर्द्धनका गतिविधिमा समेत सक्रिय छन्। ड्रागनफ्रुट खेतीको प्रवर्द्धनमा लागेका उनी आफ्नै बारीमा ड्रागनफ्रुट, शितलचिनी, कागतीलगायतका बिरुवा उत्पादन गरी विद्यालय, सामुदायिक वन, विभिन्न संघसंस्था तथा व्यक्तिलाई निःशुल्क वितरण गर्दै आएका छन्।
स्थानीयस्तरमा फलफूल खेती विस्तार गर्ने, वातावरण संरक्षणप्रति नागरिकको चासो बढाउने र बिरुवा रोप्ने संस्कृतिलाई प्रोत्साहन गर्ने उद्देश्यले उनले यस्तो अभियान सञ्चालन गर्दै आएका हुन्।
कञ्चनपुरको भीमदत्त नगरपालिका–३, तिलकपुरमा अवकाशप्राप्त सुबेदार राजेन्द्र विष्टले एक बिघा जमिनमा ड्रागनफ्रुट खेती गरी व्यावसायिक उत्पादन गर्दै आउनु पनि यस क्षेत्रमा सम्भावना रहेको उदाहरणका रूपमा लिन सकिन्छ।
धामी युवाहरूको आवाज (युथ्स भ्वाइस) संस्थाका उपाध्यक्षसमेत हुन्। संस्थामार्फत उनी युवा सहभागिता, सामाजिक उत्तरदायित्व र सामुदायिक हितसँग सम्बन्धित गतिविधिमा संलग्न हुँदै आएका छन्।
‘राजनीतिलाई आलोचना गरेर मात्र परिवर्तन सम्भव छैन’
राजनीतिमा प्रवेश गर्नुको कारणबारे धामीले समाज परिवर्तनका लागि बाहिर बसेर आलोचना गर्नु मात्र पर्याप्त नहुने बताए। उनका अनुसार राजनीतिक निर्णय प्रक्रियामा सहभागी हुँदै विद्यमान समस्या सुधार्ने प्रयास गर्नुपर्छ भन्ने सोचले आफूलाई सक्रिय राजनीतितर्फ प्रेरित गरेको हो।
राप्रपाका सांसद ज्ञानेन्द्र शाहीले व्यक्त गर्दै आएका राजनीतिक विचारबाट प्रभावित भएको उल्लेख गर्दै धामीले आफ्नो विचार र आस्थासँग मेल खाएकाले राप्रपा रोजेको बताए।
“राजनीति फोहोरी खेल हो भन्दै विरोध गरेर बस्नुभन्दा यहीँ गएर फोहोर सफा गर्नुपर्छ भन्ने सोचले मलाई राजनीतिमा लाग्न प्रेरित गरेको हो,” धामीले भने।
उनले राजनीतिक संलग्नतालाई व्यक्तिगत स्वार्थ पूरा गर्ने माध्यमभन्दा पनि समाजप्रतिको उत्तरदायित्व निर्वाह गर्ने अवसरका रूपमा लिएको बताएका छन्। जनताका समस्या पहिचान गर्ने, तिनको समाधानका लागि पहल गर्ने र समाजमा सकारात्मक परिवर्तन ल्याउने आफ्नो लक्ष्य रहेको उनको भनाइ छ।
जनताको अपेक्षा पूरा गर्नु मुख्य चुनौती
पत्रकारिताका क्रममा समाजका विभिन्न तहका नागरिकसँग नजिक रहेर काम गरेका धामीका लागि जनसम्पर्क, सामाजिक अनुभव र स्थानीय समस्याबारेको बुझाइ राजनीतिक यात्रामा उपयोगी आधार बन्न सक्छन्। यद्यपि, राजनीतिक जिम्मेवारीसँगै जनताका अपेक्षा पूरा गर्ने र प्रतिबद्धतालाई व्यवहारमा उतार्ने चुनौती पनि उनका सामु रहनेछ।
पत्रकारितामार्फत जनताको आवाज सार्वजनिक गर्दै आएका धामीले अब राजनीतिक मञ्चबाट कस्ता मुद्दा उठाउँछन्, सामाजिक अभियानलाई कसरी निरन्तरता दिन्छन् र पार्टीको प्रदेशस्तरीय जिम्मेवारीमा कस्तो भूमिका निर्वाह गर्छन् भन्ने विषय आगामी दिनमा चासोको विषय बन्नेछ।
समाचार कक्षबाट जनताका समस्या उजागर गर्दै आएका धामीको राजनीतिक यात्रा अब ती समस्या समाधानका लागि कति प्रभावकारी बन्छ भन्ने कुरा उनको आगामी कार्यशैली र जनताप्रतिको जवाफदेहिताले निर्धारण गर्नेछ।
