हेमा भट्ट/ कञ्चनपुर – कृष्णपुर नगरपालिकाले विद्यार्थीको आवतजावतलाई सहज, सुरक्षित र व्यवस्थित बनाउने उद्देश्यले नगरपालिकाभित्रका ६ वटा सामुदायिक विद्यालयलाई बस हस्तान्तरण गरेको छ। ‘शिक्षा समृद्धि हाम्रो अभियान’ अन्तर्गत कृष्णपुर नगरपालिका कार्यालयमा बुधबार आयोजित कार्यक्रममा नगर प्रमुखले सम्बन्धित विद्यालयका प्रतिनिधिलाई बस हस्तान्तरण गरेका हुन्। नगरपालिकाको शिक्षा, युवा तथा खेलकुद शाखाको आयोजनामा कार्यक्रम सम्पन्न भएको हो। बस प्राप्त गर्ने विद्यालयमा श्री नन्द माध्यमिक विद्यालय, कृष्णपुर-२ देखतभुली, उदय माध्यमिक विद्यालय कृष्णपुर-२ बंक, श्री महाकाली माध्यमिक विद्यालय कृष्णपुर-६ वसन्तपुर, श्री राष्ट्रिय माध्यमिक विद्यालय कृष्णपुर-१ पहरिया, श्री वाणी माध्यमिक विद्यालय कृष्णपुर-८ र श्री कृष्ण माध्यमिक विद्यालय कृष्णपुर-४ रहेका छन्। नगरपालिकाका अनुसार ५० सिट क्षमताका ६ वटा बस भन्सार छुट प्रक्रियामार्फत खरिद गरी विद्यालयलाई हस्तान्तरण गरिएको हो।
बसको लागत अनुमान ५४ लाख रुपैयाँ रहेकोमा ४५ लाख ४५ हजार रुपैयाँमा सम्झौता भएको जनाइएको छ। बस आपूर्तिकर्ता सिद्धार्थ ट्रेडिङ प्रा.लि. रहेको छ। हस्तान्तरण गरिएका बस २०२६ मोडल, बीएस-६, ३२०० सीसी इन्जिन क्षमताका रहेका छन्। कार्यक्रममा नगर प्रमुखले विद्यालय र नगरपालिकाबीच भएको सहमति तथा सम्झौताअनुसार बसको प्रभावकारी सञ्चालन र व्यवस्थापन गर्नुपर्नेमा जोड दिए। उनले बसको मुख्य उद्देश्य विद्यार्थीलाई विद्यालयसम्म पुग्न सहज वातावरण निर्माण गर्नु रहेको भन्दै यसको सही उपयोग र संरक्षणमा विद्यालय व्यवस्थापन, शिक्षक, अभिभावक तथा विद्यार्थी सबैको जिम्मेवारी रहने बताए। नगरपालिकाले शिक्षा क्षेत्रलाई प्राथमिकतामा राख्दै विद्यार्थीको सिकाइ वातावरण सुधार, विद्यालयसम्मको पहुँच विस्तार तथा शैक्षिक पूर्वाधार विकासमा निरन्तर काम गरिरहेको जनाएको छ।
शिक्षा सँगसँगै स्वास्थ्य र कृषि क्षेत्रलाई पनि प्राथमिकतामा राखेर नगरपालिकाले काम अघि बढाइरहेको नगर प्रमुखको भनाइ थियो। विद्यालयका शिक्षक, विद्यार्थी, व्यवस्थापन समितिका अध्यक्ष तथा स्थानीयवासीले नगरपालिकाले विद्यार्थीको दैनिक आवतजावतलाई लक्षित गरी बस उपलब्ध गराउनु सकारात्मक र आवश्यक कदम भएको बताएका छन्। उनीहरूले विशेषगरी टाढाबाट विद्यालय आउने विद्यार्थीलाई सुरक्षित तथा सहज रूपमा विद्यालय पुग्न बस सेवा उपयोगी हुने विश्वास व्यक्त गरेका छन्। नगरपालिकाका अनुसार बस सञ्चालनसँगै विद्यालयमा विद्यार्थीको नियमित उपस्थिति बढाउन, आवतजावतमा हुने कठिनाइ घटाउन तथा ग्रामीण क्षेत्रका विद्यार्थीलाई शिक्षामा पहुँच विस्तार गर्न सहयोग पुग्ने अपेक्षा गरिएको छ। यसअघि २०८२-१२-१४ गते सूचना प्रकाशन गरी खरिद प्रक्रिया अघि बढाइएको थियो। नगरपालिकाले शिक्षा क्षेत्रमा गरेको लगानीलाई विद्यालयको भौतिक पूर्वाधारसँगै विद्यार्थीको प्रत्यक्ष आवश्यकतासँग जोडिएको कार्यक्रमका रूपमा अघि बढाएको जनाएको छ। कार्यक्रममा जनप्रतिनिधि, विद्यालय व्यवस्थापन समितिका पदाधिकारी, प्रधानाध्यापक, शिक्षक, विद्यार्थी तथा स्थानीयको सहभागिता रहेको थियो। समाचारलाई छोटो र प्रभावकारी बनाऊ
