झलारी: शुक्लाफाँटा नगरपालिका भित्र रहेका अभिभावकविहीन तथा शिक्षाबाट वञ्चित बालबालिकाको भविष्य उज्यालो बनाउने उद्देश्यका साथ नेकपा (माओवादी केन्द्र) का युवा नेता तथा वाइसीएलका केन्द्रीय उपाध्यक्ष नवराज ऐरले सुरु गरेको सहयोग अभियान निरन्तर जारी रहेको छ । अभियान अन्तर्गत हालसम्म वडानं. २ ढकनिया बस्ने सिद्धबैजनाथ माध्यमिक विद्यालय बंसाहा कक्षा ६ की दिपिका हुम्लि, वडानं. ८ पिल्लरी बस्ने कालिका माध्यमिक विद्यालय बंडका कक्षा ७ का रोशन साउद, र वडानं. १२ खल्लापट्टि बस्ने शिवशक्ति माध्यमिक विद्यालय कालागौडी कक्षा ८ का निखिल राना लाई मासिक पाँच हजारका दरले चार महिनादेखि निरन्तर शैक्षिक सहयोग प्रदान गरिएको छ।
सहयोगको कार्य एसओएस बालग्रामसँगको समन्वयमा सञ्चालन गरिएको हो। ऐरका अनुसार थप तीन जना अभिभावकविहीन बालबालिकाको सहयोगका लागि पनि प्रक्रिया अघि बढाइएको छ। उनले नगरभित्र रहेका १४ वर्ष मुनिका अन्य अभिभावक विहीन बालबालिकाबारे जानकारी हुने सबैलाई एक महिनाभित्र सम्पर्कमा ल्याउन आग्रह गरेका छन्। “अनाथ बालबालिकालाई शिक्षाबाट वञ्चित हुन नदिन र उनीहरूको भविष्य निर्माणमा सहयोग पुर्याउने हाम्रो उद्देश्य हो,” ऐरले बताए।
उनले यस अभियानमा निरन्तर साथ र सहयोग प्रदान गर्दै आएका एसओएस बालग्रामका सम्पूर्ण कर्मचारीहरूप्रति आभार व्यक्त गरेका छन्। शुक्लाफाँटा नगरपालिकामा यसअघि भएको स्थानीय तहको निर्वाचनमा मेयरका उम्मेदवार रहेका युवा नेता ऐर पछिल्ला वर्षहरूदेखि शिक्षा, समाजसेवा र मानव कल्याणका क्षेत्रमा सक्रिय रहँदै आएका छन्। उनले आफ्नो पहलमा विभिन्न विद्यालय र कलेजहरूमा विपन्न विद्यार्थीका लागि निःशुल्क शिक्षा र छात्रवृत्तिका व्यवस्था गर्दै आएका छन्।
