हेमा भट्ट/ कञ्चनपुर : कार्तिक १८ कञ्चनपुर जिल्ला, कृष्णपुर नगरपालिका–६ बालुवाफाँटास्थित श्री एकता सामुदायिक वन उपभोक्ता समूहको १३औं वार्षिक साधारणसभा “दिगो वन व्यवस्थापन, उपभोक्ताको अधिकार र सामुदायिक एकता” भन्ने मूल नाराका साथ भव्य रूपमा सम्पन्न भएको छ। कार्यक्रम सामुदायिक वनको प्राङ्गणमा अध्यक्ष देब बहादुर वडको सभापतित्वमा सम्पन्न भएको थियो। कार्यक्रममा वडा नं. ६ का अध्यक्ष बाबुराम चौधरी प्रमुख अतिथि रहेका थिए। त्यसैगरी, सिएफसिसी कञ्चनपुरका अध्यक्ष तथा सिंहपुर सामुदायिक वनका अध्यक्ष जोगराज चौधरी, सिमहाकालीका उपाध्यक्ष तथा सीता सामुदायिक वनका अध्यक्ष पुनाराम चौधरी, महाकाली सामुदायिक वनका अध्यक्ष वीर बहादुर राजवंशी, वन रक्षक निराजन सिंह र हरि सार्की, समाजसेवी अमन दहित, विभिन्न सामुदायिक वनका पदाधिकारी, शिक्षक, बुद्धिजीवी तथा सञ्चारकर्मीहरूको उल्लेखनीय उपस्थिति रहेको थियो।
कार्यक्रमको उद्घाटन प्रमुख अतिथिहरूले संयुक्त रूपमा ब्यानर बाचन र दियो प्रज्वलन गरेर गरेका थिए। उद्घाटन सत्रमा वन संरक्षण, हरित विकास र पर्यावरणीय चेतना अभिवृद्धिका सन्देशहरू प्रस्तुत गरिएका थिए। विशिष्ट अतिथि पुनाराम चौधरीले वन व्यवस्थापनमा उपभोक्ता र समितिबीचको समन्वय सुदृढ गर्नुपर्ने धारणा राखे भने राजवंशीले पारदर्शिता र सहभागिता सुनिश्चित गर्नुपर्नेमा जोड दिए। सभापति देब बहादुर वडले समूहको वार्षिक प्रतिवेदन प्रस्तुत गर्दै गत वर्षका उपलब्धि, आय–व्यय विवरण र वन व्यवस्थापनका चुनौतीहरूबारे विस्तृत जानकारी दिए। उनले उपभोक्ताबाट प्राप्त सुझावहरूलाई आगामी योजनामा समेट्ने प्रतिबद्धता पनि व्यक्त गरे। सहसचिव राजेन्द्र पन्तले आगामी वर्षको अनुमानित बजेट र प्राथमिकता प्रस्तुत गरे भने लेखा संयोजक लक्ष्मीराज पण्डितले वित्तीय विवरण पेस गरे। त्यसैगरी, कोषाध्यक्ष रेनुका चौधरीले स्वागत मन्तव्य दिँदै सबै अतिथि र सहभागीप्रति आभार प्रकट गरिन्।
कार्यक्रमको सञ्चालन सचिव शेर बहादुर रोकायाले गरेका थिए। सरस्वती माध्यमिक विद्यालयका प्रधानाध्यापकले स्वागत मन्तव्य दिएका थिए भने युवा समाजसेवी मनिष ओझाले सामुदायिक वनमा पारदर्शिता र उत्तरदायित्वका विषयमा जोड दिए। सहभागीहरूले “हाम्रो वन, हरियो वन” बनाउने संकल्प व्यक्त गरे। कार्यक्रममा थारू छौरा नाच, डेउडा नृत्य र सहिद–थीमका नाटक प्रस्तुत गरिएका थिए, जसले सामुदायिक एकता र पर्यावरणीय सन्देशलाई सशक्त रूपमा उजागर गरेको थियो। कलाकारहरूलाई संस्थाले मायाको चिनो प्रदान गर्दै सम्मान गरेको थियो। कार्यक्रमको अन्त्यमा सभापति वडले सबै अतिथि, सदस्य, शुभेच्छुक र सञ्चारकर्मीप्रति धन्यवाद ज्ञापन गर्दै आगामी वर्षमा वन संरक्षण, सामाजिक उत्तरदायित्व र दिगो विकासमा अझ प्रभावकारी रूपमा काम गर्ने प्रतिबद्धता जनाए। श्री एकता सामुदायिक वन उपभोक्ता समूहले हाल ८ सय उपभोक्ता र १३४.९० हेक्टर क्षेत्रफलमा वन व्यवस्थापन गर्दै आएको छ। सामुदायिक एकता, पारदर्शिता र स्थानीय विकासमा निरन्तर योगदान पुर्याउँदै आएको यो समूह अहिले पनि जिल्लाका उदाहरणीय सामुदायिक वनमध्ये एक मानिन्छ।
