कञ्चनपुर : कञ्चनपुरको महेन्द्रनगरमा रहेको रेडियन्ट माध्यमिक विद्यालयमा सोमबार कक्षागत अभिभावक भेला सम्पन्न भएको छ । विद्यार्थीहरुको पढाईको बारेमा अभिभावकहरुसँग छलफल गर्न र विद्यार्थीहरुको कमिकमजोरी पत्ता लगाई सुधार गर्ने उद्देश्यले आयोजना गरिएको उक्त अभिभावक भेलामा कक्षा ९ मा अध्ययनरत विद्यार्थीहरु र अभिभावकहरुको सहभागिता रहेको थियो ।
भेलामा अभिभावकहरुले आफ्ना नानीबाबुहरुको पढाईको अवस्था तथा बानी व्यवहार लगायतका बारेमा बताएका थिए । उक्त भेलामा बोल्दै विद्यालयमा प्रिन्सिपल सूर्य बहादुर चन्दले विद्यार्थीहरुको शैक्षिक स्तर सुधार गर्नका लागि विद्यालयले सदैव प्रयास गर्दै आईरहेको बताउनुहुँदै विद्यार्थीहरुको पहिलो पाठशाला भनेको घर परिवार भएको हुँदा प्रत्येक अभिभावकहरुले आफ्ना छोराछोरीहरुले नियमित गृहकार्य गरे नगरेको र पढाईमा ध्यान दिए नभएको बारेमा चासो राख्नुपर्ने बताउनुभयो ।
साथै उहाँले विद्यार्थीहरुलाई गुणस्तरिय शिक्षा प्रदान गर्नुका साथै असल बानी व्यवहार र संस्कार सिकाउनका लागि विद्यालय परिवार प्रतिबद्ध रहेको बताउनुभयो ।
