हेमा भट्ट/बैतडी — पाटन नगरपालिका–३ गुजरकी १४ वर्षीया बालिका पुनम काेलीको जीवन अहिले मृत्यु र जीवनबीचको संघर्षको कठिन मोडमा अड्किएको छ। असोज १९ गते शनिबार दिउँसो घरनजिकै घाँस काट्ने क्रममा पाखाबाट लडेर गम्भीर घाइते बनेकी पुनम अहिले धनगढीस्थित नवजीवन अस्पतालको आइसीयू (ICU) कक्षमा उपचाररत छिन्।
बाल्य उमेरमै जिन्दगीसँग युद्ध लडिरहेकी पुनम अहिले पनि होसमा आएकी छैनन्। अस्पतालका चिकित्सकहरूका अनुसार उनको टाउकोमा गम्भीर चोट लागेको छ र शरीरका विभिन्न भागमा समेत निलडाम चोटपटक छन्। सुरुमा उनलाई भेन्टिलेटरमा राखिएको थियो, अहिले केही सुधार देखिए पनि अवस्था अझै नाजुक छ। पुनमका दाजु हरि काेलीको आवाजमा वेदना र असहायताको मिश्रण थियो जब उनले रैकवार खबर डट कमसँग भने — “डाक्टरहरूले भनेका छन्, होसमा आउन समय लाग्न सक्छ, कहिले केही दिनमा त कहिले महिनौँसम्म पनि। हाम्रो परिवार निकै कमजोर आर्थिक अवस्थामा छ। अहिले सम्मको उपचारमा तीन लाख रुपैयाँभन्दा बढी खर्च भइसकेको छ। तर अझै पनि उपचार लामो समय चल्न सक्छ। म सबै दयालु मनका साथीसंगीहरू, नगरवासी र देशविदेशमा रहनुहुने शुभेच्छुकहरूलाई विनम्र अनुरोध गर्दछु — कृपया मेरी बहिनीलाई बचाउन सहयोग गरिदिनुहोस्।”
उनी बोल्दा आँखाबाट आँसुको धार रोकिने नाम लिँदैनथ्यो। दाजु हरिको त्यो पीडा सुन्दा लाग्थ्यो — एक असहाय परिवार कति कठिन परिस्थितिमा बाँच्न प्रयासरत छ। त्यो दिनको घटना सम्झिँदै पुनमकी आमा जानकी काेली मिडियासँग कुरा गर्दै रुँदै भनिन् — “मेरो छोरी बिहान हाँस्दै घरबाट घाँस काट्न गएकी थिइ। केही घण्टामै खबर आयो – पुनम भिरबाट खसी गम्भीर घाइते भइछे। त्यो क्षणदेखि मेरो संसार अन्धकार भयो। अहिले पनि अस्पतालमा छोरीको श्वास गन्ने काम मात्र गर्न सक्छु। भगवान, मेरी छोरीलाई बचाइदेऊ।” नगरपालिकाका उपप्रमुख कमलसिंह बोहराले घटनाप्रति गहिरो दुःख व्यक्त गर्दै भने — “यो अत्यन्तै दुखद घटना हो। नगरपालिकाले पीडित परिवारलाई सहयोग गर्न तयार छ। परिवारले उपचारका बिल र कागजात पेश गरेपछि सक्दो सहयोग नगरपालिकाबाट प्रदान गरिनेछ। साथै, समाजका अन्य सहयोगी हातहरू पनि अघि बढून् भन्ने अपिल गर्दछु।”
पुनमको अवस्थाले गाउँ–ठाउँभरका मानिसको मन छोएको छ। उनका सहपाठीहरू, शिक्षकहरू, छरछिमेकीहरू र शुभेच्छुकहरूले सामाजिक सञ्जालमार्फत सहयोग अभियान सुरु गरेका छन्। कोही आर्थिक सहयोग जुटाइरहेका छन्, कोही रगत दिन तयारी जनाइरहेका छन्। यो कथा केवल एक परिवारको पीडा मात्र होइन — यो कथा हो, गाउँकी एउटा बालिकाको जीवनसँगको संघर्षको। त्यो संघर्ष जसमा आमाको आँसु, दाजुको निःस्वार्थ माया र समुदायको सहानुभूति मिसिएको छ। पुनम अहिले पनि अस्पतालको ओछ्यानमा निश्चल छिन्, तर उनका प्रियजनहरू र शुभेच्छुकहरूका हजारौँ प्रार्थनाले उनलाई पुनः जीवन फर्काउने विश्वास पालिरहेका छन्। कसैले पनि यस्तो अवस्थामा नपरोस्, र समाजका सबै संवेदनशील हृदयहरूले स–सानो सहयोगमार्फत पुनमको जीवनमा फेरि उज्यालो ल्याउन सकून् — यही हो अहिलेको सबैभन्दा ठूलो अपेक्षा।
