कञ्चनपुर :  कञ्चनपुरको भीमदत्त नगरपालिका १९ बागफाँटामा गड्यौलाबाट प्राङगारिक मल उत्पादन शुरु गरिएको छ । त्रिबेणी टोल विपद् व्यवस्थापन समितिले गड्यौलाबाट प्राङगारिक मल उत्पादन गरेको हो । त्रिबेणी टोल विपद् व्यवस्थापन समितिका अध्यक्ष सरस्वती चन्द(सिह)ले गाँउमा रसायनमुक्त कृषिका लागि प्राङगारिक मल उत्पादन गरिएको बताईन । ‘अन्नबालीमा रसायनयुक्त मलको प्रयोगले मानव स्वास्थ्यमा समेत असर परेको छ, ‘उनले भनिन, ‘त्यही भएर हामीले गड्यौला पालेर प्राङगारिक मल उत्पादन गरिरहेका छौँ ।’ उक्त बागफाँटामा गाईपालनका लागि खोर निर्माणसगै उत्पादन गरिएको जैविक मल स्थानीय स्तरदेखि अन्य माग भएका स्थानमा बिक्रि वितरण गरिने अध्यक्ष चन्दले बताईन । गत असोजमा जैविक मल उत्पादनकै लागि त्रिवोणीधाममा गौशाला निर्माणको कार्य शुरुवात गरिएको थियो । सिद्धवैजनाथ त्रिवेणी धामका अध्यक्ष मिलन सिहले छाडा पशु चौपयाको व्यवस्थापन सहित जैविक मल उत्पादन गरेर स्थानीय स्तरमा रोजगारी सृजना साथै मानव स्वास्थ्यका लागि रसायनमुक्त खेतबारी बनाउने अभियान रहेको बताए ।

उनका अनुसार भीमदत्त नगरपालिका स्थानीय सरकार र निड्स नेपालको सहयोगमा गड्यौला मल उत्पादन शुरु गरिएको बताए । उनका अनुसार २४ खाचामा मल उत्पादन शुरु गरिएको छ । ‘छेउमै चौधर नदी छ, बर्षातका बेला नदी कटानीले विपद् निम्त्याउँछ, ‘उनले भने, ‘यसको पनि समयमै व्यवस्थापन नभए यत्रो ठुलो योजना विफल हुन्छ, त्यसका लागि चौधर नदीको कटानी नियन्त्रण आवश्यक छ ।’ मल उत्पादन शुरु भईरहेको बताउँदै उनले अहिले नै १०क्विन्टलको अर्डर आएको बताए । तरकारीदेखिका अन्य अन्नबालीको उत्पादन बृद्धिका लागि प्राङगारिक मल अत्यन्तै उपयोगी भएको उनले बताए । ‘यो हाम्रो योजना बहुउपयोगी छ, ‘उनले भने, ‘यसबाट किसानदेखि व्यवसायी सबैलाई लाभै लाभ हुन्छ ।’ निड्स नेपाल स्कोट आर ३परियोजना संयोजक ईश्वर उपाध्यायले गड्यौलाबाट जैविक मल उत्पादनका लागि ८लाख बराबरको आर्थिक सहयोग एव प्राविधिक सहयोग गरेको बताए । विपद् जोखिम रहेका बस्तीका स्थानीयको जिवनस्तर बृद्धि एव स्थानीय स्तरमै रहेका स्रोत साधानको उपभोग गरेर आत्मनिर्भर बनाउनका लागि सहयोग गरेको बताए ।

गत असोज दोस्रो साता भीमदत्त नगरकी उपप्रमुख निलम लेखकले उक्त गौशालाको शिलान्यास गर्दै छाडा पशु चौपाया नियन्त्रण गरेर गाईपालनदेखि जैविक मल उत्पादनका लागि पालिकाबाट आवश्यक सहयोग गर्ने बताएकी थिईन । शनिबार एक कार्यक्रमका विच स्थानीय, निड्स नेपाल सहितका सरोकारवालाहरुले निड्स नेपालद्धारा संचालित एव सहयोग गरिएका कार्यक्रमको स्थलगत अनुगमन गरिएको छ । कञ्चनपुरका प्रमुख जिल्ला अधिकारी नारायण प्रशाद सापकोटाले उक्त गौशालाको स्थलगत अनुगमन गर्दै स्थानीय स्तरबाटै कृषिका कार्यक्रममा अग्रसरता देखाउँदै स्वदेशमै सम्भावनाको खोजी गर्नुपर्ने बताए । चौधर नदी नियन्त्रणका लागि प्रजिअ सापकोटाले सम्बन्धीत सरोकारवालासंग छलफल गरेर समयमै तटबन्ध निर्माण गर्दै विपद्बाट जोगाउने बचन दिएका छन । भीमदत्त नगरपालिका १३पिपरैयाको रामानुज महिला सशक्तिकरण केन्द्र मार्फत तरकारी खेती, ड्रागनखेती सहित दोधाराचाँदनीमा संचालित योजनाको स्थलगत अनुगमन गरिएको हो । कञ्चनपुरका प्रमुख जिल्ला अधिकारी सापकोटा सहित निड्स नेपालका सचिव देवचन्द्र उपाध्याय, मनराज उपाध्याय, परियोजना संयोजक ईश्वर उपाध्याय सहितका सरोकारवालाले स्थलगत अनुगमन गरेका थिए ।