कञ्चनपुर
कञ्चनपुर जिल्लाको पुनर्वास नगरपालिका वडा नम्बर ११ डोके बजारसँग सीमा जोडिएको गौरीफण्टा नाकाबाट अहिले दैनिक औसतमा हजार जना जति नागरिकहरू ओहोरदोहोर गर्ने गर्दछन् । उक्त नाका भएर सुदूरपश्चिम प्रदेशका सबै जिल्ला सहित देशका अन्य भूभागका नागरिकहरू भित्रिने गरेका छन् भने त्यत्तिकै सङ्ख्यामा नेपालबाट उक्त नाका भएर भारत जाने नागरिकहरू पनि छन् । यद्यपि उक्त नाका भएर आवतजावत गर्ने नागरिकहरू मध्ये २० प्रतिशत जति नागरिकहरूको मात्रै सामान्य स्वास्थ्य जाँच गरी गन्तव्य तर्फ पठाउने गरिएको छ । उक्त नाकामा पुनर्वास नगरपालिकाले एउटा हेल्थ डेस्क र सानो होल्डिङ् सेन्टर राखेको छ भने दश जना जति स्वास्थ्यकर्मी र स्वयंसेवकहरूको टोली पनि खटाइको छ । तर अहिलेको असामान्य परिस्थितिमा ती संरचना र जनशक्तिले थेग्न सक्ने अवस्था नरहेको पुनर्वास नगरपालिकाका नगर प्रमुख जीवन राज थापाको भनाइ छ ।
स्थानीय सरकारको हैसियतले पुनर्वास नगरपालिकाबाट सकिने जति सक्रियता बढाएको भए पनि अन्यत्रबाट खास्सै सहयोग नपाएको नगर प्रमुख थापाको गुनासो छ । गत वर्ष पनि यस्तै परिस्थिति हुँदा सबैको सहयोगले सहज भए पनि यस वर्ष एक्लो महसुस गरेको उहाँले दुखेसो पोख्नुभयो । गत वर्ष गौरीफण्टा नाकालाई कञ्चनपुरकै हो भनी निरन्तर सहयोग र सहकार्य गर्ने तत्कालीन प्रमुख जिल्ला अधिकारी नूरहरि खतिवडा र सबै सुरक्षा निकायका प्रतिनिधिहरूलाई स्मरण गर्दै उहाँले अहिलेको कोभिड १९ सङ्कट व्यवस्थापन समिति कञ्चनपुरबाट अपेक्षाकृत सहयोग नपाएको गुनासो गर्नुभयो । सँगै जोडिएको कैलाली जिल्ला प्रशासन र धनगढी उपमहानगरपालिकाले समेत सहयोग गर्नुको सट्टा हस्तक्षेपकारी भूमिका निर्वाह गर्न खोजेको प्रति नगर प्रमुख थापाले असन्तुष्टि व्यक्त गर्नुभयो । प्रदेश राजधानीकै मुख निर रहेको गौरीफण्टा नाकाको व्यवस्थापनमा सबैभन्दा बढी सहयोगको अपेक्षा सुदूरपश्चिम प्रदेश सरकारबाट गरिए पनि प्रदेश सरकार नै निष्क्रिय देखिएको उहाँको भनाइ छ ।
पुनर्वास नगरपालिकाका उपप्रमुख शारदा शर्मा बिष्टले जोखिमपूर्ण यस अवस्थामा सीमामा खटिनुभएका स्वास्थ्यकर्मी, सुरक्षाकर्मी, अन्य सरोकारवालाहरूलाई सकारात्मक रूपमा सहयोग गर्न, अनावश्यक भिडभाड नगर्न र एकताको भावनाका साथ यो सङ्क्रमणकालीन अवस्थालाई सामना गरी सामूहिक दायित्व बहन गर्न सबै पक्षसँग अपिल गर्नुभएको छ । गौरीफण्टा नाका पुनर्वास नगरपालिकाको भूमि भए तापनि व्यवस्थापनको पक्षमा सुदूरपश्चिम प्रदेशमा रहनु भएका सबै जनप्रतिनिधिको हैसियतले विशेष पहल गरिदिन समेत उहाँले आग्रह गर्नुभएको छ । उपप्रमुख बिष्टले कञ्चनपुरका दुई मुख्य नाका गड्डाचौकी र गौरीफण्टा मध्ये गड्डाचौकी तर्फ मात्रै बढी ध्यान केन्द्रित गरी गौरीफण्टा नाकालाई उपेक्षा गरेको पाइएकोले जिल्ला प्रशासन कार्यालय कञ्चनपुर सहित कोभिड १९ सङ्कट व्यवस्थापन समितिको ध्यानाकर्षण गराउनु भयो । उहाँले दक्षिणी क्षेत्रका बेलौरी नगरपालिका तथा बेलडाँडी र लालझाडी गाउँपालिका सहित कञ्चनपुरका सबै स्थानीय तहहरूलाई समेत सहयोग र सहकार्यका लागि अनुरोध गर्नुभयो ।
