दोधारा । चार दशक लामो राजनीतिक तथा सामाजिक अनुभव समेटेका मान बहादुर सुनार यतिबेला कञ्चनपुर निर्वाचन क्षेत्र नम्बर ३ मा घरदैलो अभियानलाई तीव्र बनाइरहेका छन्।
निर्वाचन नजिकिँदै जाँदा उनी बिहानदेखि साँझसम्म गाउँ–टोल, बस्ती, चोक–चौराहादेखि कृषक बस्ती र शहरी क्षेत्रसम्म पुगेर मतदातासँग प्रत्यक्ष संवादमा व्यस्त देखिन्छन्।सुनारले घरदैलोका क्रममा स्थानीय नागरिकका समस्या, सुझाव र अपेक्षालाई प्राथमिकताका साथ सुन्दै आएका छन्।
सडक स्तरोन्नति, सिँचाइ व्यवस्थापन, रोजगारी सिर्जना, गुणस्तरीय शिक्षा र सहज स्वास्थ्य सेवाका विषयमा मतदाताले खुलेर धारणा राख्ने गरेका छन्। उनले यी मुद्दालाई योजनाबद्ध रूपमा सम्बोधन गर्ने प्रतिबद्धता जनाउँदै संघीय संरचनाअनुसार स्थानीय, प्रदेश र संघीय तहबीच प्रभावकारी समन्वय गरी परिणाममुखी विकास अगाडि बढाउने बताएका छन्।
घरदैलो कार्यक्रममा सहभागी स्थानीय बासिन्दाले सुनारको सरल जीवनशैली, स्पष्ट दृष्टिकोण र लामो राजनीतिक अनुभवलाई सकारात्मक रूपमा लिएको बताउँछन्। धेरै स्थानमा महिलाहरू, युवा समूह तथा ज्येष्ठ नागरिकको उल्लेखनीय सहभागिता देखिएको छ।
युवाहरूले रोजगारी, सीप विकास र उद्यमशीलता प्रवर्द्धनमा जोड दिएका छन् भने कृषकहरूले मल, बीउ, सिँचाइ र बजार व्यवस्थापनका विषय उठाएका छन्।सुनारले आफू राजनीति भन्दा माथि उठेर सेवा भावनाका साथ अघि बढेको बताउँदै “जनताको मत मात्रै होइन, विश्वास जित्ने अभियान” सञ्चालन गरिरहेको उल्लेख गरेका छन्।
उनका अनुसार विकासका योजनाहरू कागजमा सीमित नराखी कार्यान्वयनमा जोड दिइनेछ। पारदर्शिता, सुशासन र सामाजिक न्यायलाई केन्द्रमा राख्दै सबै समुदाय र वर्गलाई समेट्ने गरी नीति तथा कार्यक्रम अघि सारिने उनले स्पष्ट पारे।समर्थकहरूका अनुसार निरन्तर जनसम्पर्क, सक्रिय उपस्थिति र व्यवहारिक प्रतिबद्धताका कारण क्षेत्र नम्बर ३ मा सुनारप्रति जनविश्वास क्रमशः बढ्दो छ।
कतिपय राजनीतिक विश्लेषकहरूले पनि उनको निरन्तर घरदैलो र जनसंवादलाई चुनावी रणनीतिका रूपमा प्रभावकारी कदमका रूपमा मूल्यांकन गरेका छन्।घरदैलो अभियान अझै तीव्र पार्दै सुनारले समृद्ध, व्यवस्थित र अवसरमूलक कञ्चनपुर–३ निर्माण गर्ने लक्ष्यका साथ अभियान जारी राखेका छन्।
स्थानीय तहको सुदृढीकरण, पूर्वाधार विकास, कृषि आधुनिकीकरण र सामाजिक सद्भाव कायम राख्दै समावेशी विकासको यात्रामा अघि बढ्ने उनको अठोट देखिन्छ।निर्वाचनको माहोल तातेका बेला निरन्तर जनसम्पर्कमा देखिएका मान बहादुर सुनार कञ्चनपुर–३ मा दिनप्रतिदिन थप मजबुत बन्दै गएको स्थानीय राजनीतिक वृत्तमा चर्चा हुन थालेको छ।
