कञ्चनपुर : भीमदत्त नगरपालिका–४ स्थित श्री शुभलाभ कृषि सहकारी संस्था लिमिटेडले नेपाल पत्रकार महासंघ कञ्चनपुरका अध्यक्ष सुरेश सिंह धामीको उपचारका लागि आर्थिक सहयोग प्रदान गरेको छ। क्यान्सर संक्रमणका कारण धामी भारतको राजिव गान्धी क्यान्सर अस्पतालमा उपचाररत छन्। उपचार खर्च अत्यधिक बढ्दै गएपछि विभिन्न कार्यालय तथा व्यक्तिहरूले धामीको जीवनरक्षाका लागि सहयोग उपलब्ध गराउँदै आएका छन्।
उही अभियानअन्तर्गत सहकारीका अध्यक्ष सिद्धराज भट्टले नेपाल पत्रकार महासंघ कञ्चनपुरका सचिव कुन्दन पाण्डेलाई सहयोग रकम हस्तान्तरण गरेका हुन्। सो अवसरमा अध्यक्ष भट्टले पत्रकार धामीको छिटो स्वास्थ्यलाभको कामना गर्दै आफ्नो संस्थाले सामाजिक जिम्मेवारी अन्तर्गत सहयोग गर्न पाएकोमा खुशी व्यक्त गरे। “हामीले सानो सहयोग मात्र गरेका हौं। सबैले यसरी सहयोग गरिदिए पत्रकार धामीलाई केही राहत मिल्थ्यो,” भट्टले भने।
सामाजिक क्षेत्रमा सक्रिय रहँदै आएका पत्रकार धामीको उपचारमा ठूलो धनराशी आवश्यक हुने भएकाले व्यक्तिगत स्रोत समाप्त भएपछि उनले सहयोगका लागि अपिल गरेका छन्।
