कञ्चनपुर : कञ्चनपुरको महेन्द्रनगरमा रहेको रेडियन्ट माध्यमिक विद्यालको शैक्षिक अवलोकन भ्रमण शनिबार सम्पन्न भएको छ । स्थानीय पर्यटन प्रवर्द्धन गर्नुका साथै विद्यार्थीहरुलाई स्थानीय पर्यटकिय तथा महत्वपूर्ण स्थलहरुको बारेमा जानकारी र व्यवहारिक ज्ञान प्रदान गर्ने उद्देश्यले कञ्चनपुरको बेलौरी नगरपालिकामा रहेको शोभा तालको शैक्षिक अवलोक भ्रमण गरिएको विद्यालयमा प्रिन्सिपल सूर्य बहादुर चन्दले बताउनुभयो ।
साथै उहाँले शैक्षिक भ्रमण केवल घुमफिर र मनोरन्जनका लागि मात्रै नभई भ्रमणको माध्यमबाट विद्यार्थीहरुलाई धार्मिक, पर्यटकिय तथा ऐतिहासिक दृष्टिकोणले महत्वपूर्ण स्थानहरुको बारेमा जानकारी दिने र विद्यार्थीहरुको सामाजिक र सांस्कृतिक चेतना अभिवृद्धी गर्न मद्दत पुर्याउनुका साथै कक्षामा सिकेका ज्ञानलाई व्यवहारिक रुपमा परिक्षण गर्ने अवसर प्रदान गर्न विद्यालयले शैक्षिक भ्रमण गरेको बताउनुभयो ।
उक्त शैक्षिक भ्रमणमा विद्यालयमा अध्ययनरत कक्षा ३ देखि कक्षा ६ सम्मका विद्यार्थीहरु र शिक्षक, शिक्षिकाहरुको सहभागिता रहेको थियो । शैक्षिक भ्रमणका क्रममा आफुहरुले नयाँ कुराहरु सिक्नुका साथै स्थानीय स्तरका रहेका महत्वपूर्ण स्थलहरुको बारेमा जानकारी प्राप्त गर्ने अवसर प्राप्त भएको कक्षा ६ मा अध्ययनरत छात्रा सुवेज्ञा विष्टले बताउनुभयो ।
विद्यालयको वार्षिक कार्ययोजना अन्तर्गत रेडियन्ट मा.वि.ले केही महिना पहिले मात्रै कक्षा ७ देखि कक्षा १० सम्मका विद्यार्थीहरुका लागि कैलाली जिल्लामा रहेको टिकापुर पार्कको शैक्षिक अवलोकन भ्रमण गरेको थियो भने कक्षा नर्सरी देखि कक्षा २ सम्मका विद्यार्थीहरुका लागि महेन्द्रनगरमा रहेको भीम बाटिकामा शैक्षिक अवलोकन भ्रमण सम्पन्न गरेको थियो ।
