कञ्चनपुर : प्रिन्सिपल एसोसिएसन अफ नेपाल (प्यान) द्वारा कञ्चनपुर जिल्लामा “गुणस्तरीय र समतामूलक शिक्षाका लागि सामुदायिक विद्यालयको शसक्तिकरण” विषयक अन्तर्क्रिया कार्यक्रम सम्पन्न भएको छ।
प्यान कञ्चनपुरका जिल्ला अध्यक्ष हिक्मत सिह ऐरीको अध्यक्षतामा सम्पन्न कार्यक्रममा वेदकोट नगरपालिकाका नगर प्रमुख भोजराज बोहरा प्रमुख अतिथि रहनुभएको थियो। कार्यक्रममा (प्यान)का संस्थापक जिल्ला सदस्य प्रकाश चन्द ले जिल्लाको सामुदायिक शिक्षाका चुनौतीहरू, अवसरहरू, असल अभ्यासहरु र सम्बन्धित पक्षहरूको चासो विषयमा प्रस्तुतिकरण गर्नुभएको थियो। कार्यक्रममा स्वागत मन्तव्य प्यान कञ्चनपुरका जिल्ला उपाध्यक्ष सुरेन्द्र सिह साउदले गर्नुभएको थियो भने सञ्चालन सहसचिव गणेशदत्त शर्माले गर्नुभएको थियो।
कार्यक्रममा प्यान सुदूरपश्चिमका महासचिव बिष्णु भण्डारीले संस्थाको उद्देश्य र क्रियाकलापबारे प्रकाश पार्नुभएको थियो। त्यस्तै, वेदकोट नगर अध्यक्ष नवराज पन्तले प्यानल छलफल सञ्चालन गर्नुभएको थियो।
प्यानलमा नगर प्रमुख भोजराज बोहरा, सुदूरपश्चिम विश्वविद्यालयका पूर्व सहायक डीन डा. मदन सिह देउपा, भीमदत्त शिक्षा शाखा प्रमुख हरिदत्त जोशी, सामाजिक विकास समिति संयोजक सुशिल कुमार भट्ट, विद्यालय व्यवस्थापन समिति अध्यक्ष बिरेन्द्र राज बिष्ट तथा प्रधानाध्यापक नरेन्द्र प्रसाद जोशी सहभागी हुनु भएको थियो। वक्ताहरुले सामुदायिक विद्यालयको गुणस्तर सुधारका लागि सामुहिक प्रयास आवश्यक रहेको निष्कर्ष निकालेका छन्।
