कञ्चनपुर : कञ्चनपुरमा निर्माणाधिन मझगाँउ विमानस्थलमा एप्रोन अस्पाल्ट कंक्र्रिटबाट कालोपत्रे गरिन लागेकोे छ ।भीमदत्त नगरपालिका १६मझगाँउ विमान स्थलको एप्रोन कक्ष अस्पाल्ट कंक्रिटबाट कालोपत्रे गरिन लागेको हो । बुधबारदेखि कालोपत्रेकोे काम शुरु भएको निर्माण कम्पनीले जनाएको छ । कान्छाराम कुमार श्रेष्ठ÷अनमोल कस्ट्रक्सनले कालोपत्रेको काम शुरु भएको जनाएको छ । निर्माण कम्पनीका ईन्जिनियर युवराज रिजालले यस अघि बेस निर्माण भएको एप्रोन, रनवेयको काम कालोपत्रे शुरु गरिएको बताए । ‘आजदेखि हामीले जहाज पार्किङ्ग स्थलमा कालोपत्रेको काम शुरु गरेका छौँ, ‘ईन्जिनियर रिजालले भने, ‘यो स्थलमा जहाजमा ईज्धन भर्नेदेखि यात्रु ओराल्ने, चढाउने स्थलको कालोपत्रे सकेपछि रनवेयको काम सक्छौँ ।’
६०मिटर लम्बाई ९०मिटर चौडाई रहेको उक्त पार्किङ्ग स्थलको काम अघि बढेसंगै सरोकारवालाले मझगाँउ विमानस्थलको काम अघि बढिरहेको विश्वास व्यक्त गरेका छन । भीमदत्त नगरपालिका १६का वडाध्यक्ष केशव विष्टले विमानस्थलको काम अब कालोपत्रेको चरणमा पुगेपछि निर्माण कार्य समयमै सम्पन्न हुने आशा व्यक्त गरेका छन । भीमदत्त नगरका मेयर पदम बोगटीले तीनै तहका सरकारबाट संचालन भएको मझगाउ विमानस्थलले गति लिएको बताए । ‘आज कालोपत्रेको काम शुरु भईसकेको छ, ‘मेयर बोगटीले भने, दक्षिण तर्फ एनवेय विस्तारका लागि सेनाले पनि जमिन छाड्ने सहमती गरिसकेको छ,बिमानस्थलको काम सम्पन्न भएर चाडै संचालनमा आउँछ ।’
सुदूरपश्चिम प्रदेश सरकारका आर्थिक मामिलामन्त्री बहादुर सिह थापाले विमानस्थल संचालनका लागि प्रदेश सरकारले बजेटको कमि हुन नदिने बताए । आर्थिक मामिलामन्त्री थापाले तीनै तहका सरकारको संयुक्त लगानीमा संचालन भईरहेको विमानस्थल समयमै निर्माण सकेर यातायात सेवा संचालन गरिने बताए । कञ्चनपुर उद्योग वाणिज्य संघका अध्यक्ष पिताम्बर जोशीले पश्चिम नेपाल सीमावर्ती कञ्चनपुरको विमानस्थल संचालन भएसंगै स्वदेशी तथा भारतीय पर्यटकहरुलाई समेत नेपालका अन्य पर्यटकीय गन्तव्यमा पु¥याउन सहज हुने बताए ।
‘यो मझगाँउ विमानस्थल शुचारु भएसंगै नेपालकै अर्थतन्त्रमा समेत केही सुधार आउँछ, ‘उनले भने, ‘अब निर्माण कार्य ढिलाई गर्न नहुने देखिन्छ ।’ कालोपत्रेकोे जिम्मा पाएको अनमोल कस्ट्रक्सनका संचालक तेज बहादुर चन्दले मुल निर्माण कम्पनीसंग भएको सम्झौता अनुरुप विमानस्थलको पुरै कालोपत्रेकोे काम समयमै गुणस्तरिय रुपमा सम्पन्न गर्ने बताए । ‘हामीलाई दायित्वमा आएको काम समयमै सम्पन्न गछौँ, ‘उनले भने, ‘कालोपत्रे सम्पन्न पछि बाँकी योजना पनि शुचारु गरेर विमानस्थल छिट्टै शुचारु गर्नुपर्छ ।’
दशकौँदेखि बन्द भएको विमानस्थल पुन संचालनका लागि स्थानीय स्तरबाट दवावज सृजना भएपछि तीनै तहका सरकारबाट कामकाज अघि बढिरहेको छ । ० ५६ सालमा असुरक्षाको कारण देखाउँदै बन्द गरिएको कञ्चनपुरको महेन्द्रनगरस्थित मझगाँउ विमानस्थलको ०७८देखि निर्माण कार्य सुरु भएको छ । विमानस्थलको काम तीन वर्षभित्र निर्माण सम्पन्न गर्ने सम्झौता भएको छ । विमानस्थल निर्माण गर्न ४५ करोड ६६ लाख २४ हजार रुपैयाँमा ठेक्का सम्झौता भएको छ । नागरिक उड्डयन प्राधिकरण, २५ प्रतिशत सुदूरपश्चिम प्रदेश, १५ प्रतिशत भीमदत्र् नगरपालिका र १० प्रतिशत दोधरा चाँदनी नगरपालिकाको लगानी रहेको छ ।विमान स्थल शुचारु भएपनि स्थानिय उत्साहित भएका छन ।
