कञ्चनपुर : कञ्चनपुरको भीनपा १८ बाट प्रकाशित हुँदै आएको आभाषकुञ्ज दैनिकले आफ्नो ९ औं वार्षिकोत्सव भव्यताका साथ मनाएको छ । आफ्नो ९ औं वार्षिकोत्सव मनाउने क्रममा महाकाली प्रादेशिक अस्पतालमा रहेका बिरामीहरूलाई फलफूल वितरण गर्नुको साथै अग्रज पत्रकार माधव सिह धामीलाई नगद रु. ५ हजार ५ सय ५५ सहित दोसल्ला र प्रमाण पत्रले सम्मान गरेको छ ।
जनताको आवाज उठाउँदै आएको आभाषकुञ्ज वि.स. २०७३ चैत्र २१ गते बाट सञ्चालनमा आएको हो । यस अवधिमा निकै आरोह अवरोहको सामान गर्नु परेको प्रकाशक मनोज भट्टले बताए । उनले भने ‘जस्तो सुकै परस्थिति आए पनि जनतालाई निष्पक्ष र सही सूचना, समाचार पस्कन आफू हरदम तयार रहेको बताए ।’
उक्त वार्षिकोत्सव समारोह कार्यक्रमको प्रमुख अतिथिमा नेपाली काँग्रेस कञ्चनपुरका पार्टी सभापति एवं भीमदत्त नगरपालिकाका नगर प्रमुख पदम बोगटी रहेका थिए । प्रमुख अतिथि बोगटीले उक्त दैनिकलाई शुभकामना दिँदै उज्ज्वल भविष्यको कामना गरेका छन् । ‘पत्रिकाको उज्ज्वल भविष्यको कामना गर्दछु, पत्रकारिता पेशालाई थप मजबुत र प्रभावकारी बनाउन हामी सबैले भूमिका खेल्नु पर्छ ।’ नगर प्रमुख बोगटीले भने,–‘आभाषकुञ्ज दैनिक जिल्लामा व्याप्त भष्ट्राचार, अन्याय, अत्याचार र ढिला सुस्तीका विरुद्ध लगातार कलम चलाउँदै आएको छ, यो अभियान पत्रिकाले निरन्तर राख्ने छ भन्ने मैले पूर्ण आशा लिएको छु ।’
