कञ्चनपुर : विपद व्यवस्थापन र विपद पूर्वतयारीको लागि आपतकालीन कार्यसंचालन केन्द्रहरु बीच समन्वयात्मक बैठक भएको छ । जिल्ला प्रशासन कार्यालय कञ्चनपुरको समन्वयमा एनएनएसडब्लुए र डिसीएमको आयोजनामा समन्वयात्मक बैठक भएको हो । जिल्लाका ९ वटै पालिका बाट वन वातावरण तथा विपद् शाखा प्रमुखहरुको उपस्थितीमा विपद बाट कसरी बाच्न सकिन्छ भन्ने बारे छलफल भएको थियो ।
विपद आउने कुनै निश्चित समय नहुने र कुने पनि बेला विपद आउने हुनाले त्यसको रोकथाम र जनधनको सुरक्षाको लागि सम्बन्धित निकायहरु २४ घण्टा सर्तक रहुन पर्ने प्रमुख जिल्ला अधिकारी नारायण प्रसाद सापकोटाले बताउनु भयो साथै ‘एलईओसि र डिईओसि बिच राम्रो नेटवर्क हुनुको साथै सधैं एक आपसमा सम्पर्क गरी सही सूचना र कसरी क्षतिलाई न्युनिकरण गरी जनधनको सुरक्षा गर्न सकिन्छ । त्यसको लागि हरपल तयार रहने मा जोड दिनु भयो ।’
विपदको पूर्व तयारी र सहि समयमा जनसमुदाय बिच सूचना समप्रेषण गरेका कारण २०८१ को साउन भदौको बाढिमा जनधनको क्षति हुनबाट बचाउन सकिएको थियो । त्यसैले आउदा दिनमा पनि हुने हावाहुरी, बाढी, पहिरो, आगलागी, र भुकम्प जस्ता प्रकोप बाट बच्न र बचाउन सम्बन्धित निकायहरु चनाखो भएर लाग्नु पर्नेमा एनएनएसडब्लुएका कार्यकारी निर्देशक अशोक विक्रम जैरुले बताउनु भयो । त्यसैगरी प्रहरी उपरीक्षक चक्रराज जोशीले ‘अहिले सबैको हात हातमा मोबाईल र क्यामराको सुविधा भएकोले विपदको समयमा आफ्नो जिउधनको सुरक्षा गर्नुको साथै विपतपछि लगतै भिडियो वा फोटो बनाएर राख्दा क्षतिको वास्तविक मूल्याकंन गर्न सकिने भएकोले यसको बारेमा पनि सबै सचेत हुनु जरुरी छ ।’
मंगलबार भएको आपतकालीन कार्यसंचालन केन्द्रहरु बीच समन्वयात्मक बैठकमा सहायक प्रमुख जिल्ला अधिकारी पर्शुराम पोखरेलले विपद व्यवस्थापन सम्बन्धी प्रस्तुती गर्नु भएको थियो । कार्यक्रम सञ्चालन प्रभुनिधि पन्तले गर्नु भएको थियो ।
