राजेन्द्रप्रसाद पनेरु / कञ्चनपुर :  शुक्लाफाँटा नगरपालिका ४ असैनामा दश वेडको नगर अस्पताल भवन निर्माणको कार्य अगाडी बढाईएको छ । स्वास्थ्य तथा जनसङख्या मन्त्रालयको रु पाँच करोड ४७ लाख २९ हजार आठ सय ४७ (मूल्य अभिबृद्धिकर बाहेक) मा ठेक्का प्रकृया मार्फत निर्माण भैरहेको छ । अस्पताल निर्माणका लागि एमके विल्र्डस र निरज कन्ट्रक्सन संग अस्पताल भवन निर्माणका लागि सम्झौता गरिएको छ । सम्झौता अनुसार अस्ताल भवनको तीन ब्लकमा निर्माण कार्य भैरहेको छ । पहिलो र दोश्रो ब्लकमा छत राखने कार्य संगै चिनाई, प्लाष्टर लगायतको कार्य पुरा भएको छ भने तेश्रो ब्लकमा छत राख्नका लागि सटरिङ्गको कार्य भैरहेको नगरपालिकाका इन्जिनियर दीपक धामीले बताउनु भयो ।

उहाँका अनुसार तीन वर्ष अघि देखि निर्माण कार्य अगाडी बढाईएको अस्पतालको हाल सम्म ५५ प्रतिशत निर्माणको कार्य पुरा भएको छ । “निर्माण व्यवसायीलाई कार्य प्रगतिका आधारमा हाल सम्म रु दुई करोड ५० लाख जति रकम भुक्तानी गरेका छौं” इन्जिनियर धामीले भन्नु भयो, “असार मसान्त सम्म निर्माण कार्य पुरा गर्ने गरी म्याद थप गरिएको छ ।” निर्धारित समय भित्रै अस्पताल भवन निर्माणको कार्य पुरा गराउनका लागि कार्य भैरहेको उहाँको भनाई रहेको छ । अस्पताल भवन मन्त्रालयको मापदण्ड अनुरुप निर्माण भैरहेको उहाँको दावी रहेको छ । भवनमा मुख्य गेट, गार्डपोष्ट, शव गृह, दश शैयाको प्राथमिक अस्पताल वार्ड, विरामी जाँच्ने कोठा, कार्यालय कक्ष, सभा कक्ष, सौचालय, स्नान घर, विरामी उपचार कक्ष, शल्यक्रिया कक्ष लगायत निर्माण हुने उहाँले जानकारी दिनु भयो । यसैरी, भवन संगै वाउड्रि वाल, एम्बुलेन्स पार्किङ स्थल, स्वास्थ्य कर्मी आवास, अन्डरग्राउण्ड पानी टंकी, फोहर पानी उपचार गर्ने ठाउ, पार्क, पहुँच मार्ग लगायत निर्माण गरिने छन । भवन पूर्ण रुपमा भूकम्प प्रतिरोधी भएको इन्जिनियर धामीको भनाई रहेको छ ।

अस्पताल निर्माणको कार्य पुरा भएपछि यस क्षेत्रका बासिन्दाले उपचारका लागि टाढाको महेन्द्रनगर, धनगढी संगै भारतीय सहरहरुमा उपचारका लागि पुग्नु पर्ने अबस्थाको अन्त्य हुने वडा अध्यक्ष कमल ठकुल्लाले बताउनु भयो । अस्पतालमा सामान्य प्राथमिक उपचार देखि शल्यक्रिया सेवा समेत उपलब्ध हुने भएकाले नगर क्षेत्रका बासिन्दाले सहज रुपमा सेवा पाउने उहाँले उल्लेख गर्नु भयो । “पिपलाडी स्वास्थ्य चौकीमा चिकित्सकको व्यवस्था गरी विरामीको उपचारको व्यवस्था मिलाएका छौं” उहाँले भन्नु भयो,“अस्पताल निर्माण भएपछि चिकित्सक संग दक्ष स्वास्थ्यकर्मीको सङख्यामा बृद्धिगरी स्वास्थ्य सेवामा नगरबासीको पहुँच अभिबृद्धि हुन्छ ।” अस्पताल निर्माणको कार्य नगरकै गौरवको योजना अन्र्तगत रहेको उहाँले बताउनु भयो ।