पुनर्वास
पुनर्वासमा बुधबार राती बिधुत सर्ट भएर आगलागी भएको टेलर्स सञ्चालकलाई राष्ट्रिय सभा सदस्य माननीय ईन्दु कडरीयाले एक थान सिलाई मेसिन सहयोग गर्नुभएको छ । आगलागीले पीडित बनेका पुनर्वास-६,प्रतिभानगर स्थित न्यु काठमाडौ मामा टेलर्सका सञ्चालक अशोक दर्जीको पिडामा मलम पट्टी गर्न राष्ट्रिय सभा सदस्य कडरीयाले शनिबार एक थान सिलाई मेसिन सहयोग गर्नुभएको हो ।
आर्थिक अवस्था एकदमै दयनीय रहेका दर्जीको सिलाई पसलमा अकस्मात् बिधुत सर्ट भएर लागेको आगोले करिब सात लाख बराबरका सिलाएका कोट पाईन्ट,सर्टहरु र सिलाउन बाकी कपडाहरु, मेसिन , टेबल, काउन्टर, नगद २५ हजार र खाताहरु जलेर नष्ट भएको थियो । पसललाई आगोले ध्वस्त पारेपछि अहिले पसल सञ्चालक दर्जी आर्थिक सहयोगका लागि विभिन्न सरकारी तथा निजि निकायहरु र सहयोगी व्यक्तिहरुकोमा धाउने तयारीमा छन । भने अर्कोतिर उनी आगोले ध्वस्त पारेको ग्राहकका कपडाहरु कसरी बेहोर्ने भन्ने पिरले चिन्तित बनेर भौतारिदै छन् ।
